Parlament Májilisiniń depýtaty, «Nur Otan» partııasy fraksııasynyń múshesi Anar Jaıylǵanova Astana qalasynyń ataýyn ózgertý prosedýrasy tolyǵymen zańǵa sáıkes júrgizilip jatqanyn aıtty.
Sóz basynda depýtat hanym Elbasynyń tarıhı sheshimine nazar aýdaryp, bul máseleniń de Ata zańǵa esh qaıshy kelmeıtinin jetkizdi.
«Elbasynyń osyndaı sheshim qabyldaýy Konstıtýsııaǵa sáıkes keledi. Sebebi, oǵan deıin Elbasynyń Konstıtýsııalyq keńes arqyly bul máseleni jan-jaqty talqylap, pysyqtap alǵanyn bárimiz jaqsy bilemiz. Bul Tuńǵysh Prezıdentimizdiń Ata zańdy qurmettep, oǵan baǵynatynyn kórsetedi. Osyǵan baılanysty 20 naýryzda Senat pen Májilistiń birlesken otyrysynda Qazaqstan Respýblıkasynyń Prezıdenti ókilettigin sol kezdegi Parlament Senatynyń Tóraǵasy Qasym-Jomart Kemeluly Toqaevqa berýi týraly máseleni talqyladyq», dedi Anar Jaıylǵanova.
Sondaı-aq Májilis depýtaty atalǵan otyrysta taǵy bir mańyzdy másele qaralǵanyn aıtty.
«Sol kúni Astana qalasynyń atyn ózgertý máselesi de qaraldy. Bul máseleni Senat pen Májilis depýtattary biraýyzdan qoldap daýys berdi. Sebebi, Elbasynyń Astanany salýǵa sińirgen eńbegi orasan zor. Qaladaǵy ár ǵımaratta Elbasynyń qoltańbasy bar. Osyndaı ásem shahardyń salynýyn Tuńǵysh Prezıdentimiz tikeleı qadaǵalap, búkil kúsh-jigerin soǵan jumsady. Ony eshkim joqqa shyǵara almaıdy. Tipti jastarymyzdyń osyndaı álemdik deńgeıdegi qalada turyp jatqanyn sheteldikterdiń aldynda da úlken maqtanysh tutatynyna óz basym kámil senemin», dedi Anar Jaıylǵanova.
Osy máselege qatysty qoǵamda túrli pikirler aıtylyp jatqanyna nazar aýdarǵan depýtat onyń Konstıtýsııaǵa saı ekenin erekshe atap ótti.
«Qazir bul máseleniń Konstıtýsııaǵa qanshalyqty saı ekeni týraly kóptegen pikirler aıtylyp jatyr. Ol týraly kezinde Konstıtýsııalyq Keńestiń múshesi bolǵan adam retinde aıtar bolsam, atalǵan bastama tolyǵymen zań sheńberinde sheshilip otyr. О́ıtkeni atalǵan jaıtqa qatysty zań jobasyn Parlamentke Prezıdenttiń ózi emes Úkimet engizgen bolatyn. Konstıtýsııanyń 61-babyna sáıkes Úkimettiń osyndaı quzireti bar. Osy quzirettiń sheńberinde Úkimet ol máseleni jańa Prezıdentke usyndy. О́z kezeginde jańa Memleket basshysy bul másele boıynsha Ata zańnyń 91-babyna sáıkes Konstıtýsııalyq keńeske júgindi. Nátıjesinde Konstıtýsııalyq keńes osy másele jóninde ony Parlamentke jiberýge bolady degen arnaıy sheshim de shyǵardy. Sondyqtan Senat pen Májilis óziniń birlesken otyrysynda máseleniń zańdyq turǵyda tolyq qamtylǵanyn eskerip, zań jobasyn eki oqylymda qabyldady. Endi bul zań jobasy Prezıdent qol qoıǵannan keıin óz kúshine enedi», dedi ol.